រាជធានីភ្នំពេញ៖ ក្រោយការព្យាយាមសុំអភ័យទោសម្តងហើយម្តងទៀតពីសំណាក់ លោក ជា ប៉ូច អតីតតំណាងរាស្រ្តនៃអតីតគណបក្សសង្គ្រោះជាតិ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ក្នុងស្មារតីបង្រួបបង្រួមជាតិបានប្រកាសទទួលយកការសុំអភ័យទោសរបស់លោក ជាពិសេសក្រោយការប្រកាសផ្តាច់ខ្លួនពីលោក សម រង្ស៊ី , អតីតគណបក្សសង្គ្រោះជាតិ, គណបក្សភ្លើងទៀន និងគណបក្សដែលមាននិន្នាការប្រឆាំងផ្សេងទៀត។
ទន្ទឹមនឹងការសុំអភ័យទោសពីលោក ជា ប៉ូច អតីតតំណាងរាស្រ្តរូបនេះក៏បានស្នើសុំឱ្យសម្តេចតេជោ មេត្តាអធ្យាស្រ័យ និងសុំឱ្យតុលាការ លើកលែងការចោទប្រកាន់ដល់រូបលោកផងដែរ ដែលការណ៍នេះសម្តេចតេជោបានបញ្ជាក់ថា សម្តេចនឹងឲ្យមេធាវីរបស់សម្តេចដកពាក្យបណ្តឹងចេញពីតុលាការដើម្បីបញ្ចប់រឿងក្តីនេះឲ្យបានឆាប់។
ឆ្លៀតក្នុងឱកាសនៃសារលើបណ្ដាញសង្គមផ្លូវការ សម្តេចបានយកឱកាសនេះបញ្ជាក់ថា សម្តេចនឹងទទួលយកការសុំទោសពីមនុស្សផ្សេងទៀតដែលទទួលកំហុសនិងប្រកាសផ្តាច់ខ្លួនចេញពីជនក្បត់ជាតិបីជំនាន់ និងសូមលើកលែងទោសឲ្យពួកគេ តែនឹងមិនអត់ឱនឲ្យជនណា ឬក្រុមណាក៏ដោយដែលបន្តដើរតាមជនក្បត់ជាតិនេះជាដាច់ខាត។
ជាចុងក្រោយ សម្តេចបានសង្កត់ធ្ងន់ថា៖ "យើងមិនអាចអត់ឱនឲ្យបានទេចំពោះជនណា ឬក្រុមណាក៏ដោយមិនថាខ្មែរ ឬបរទេសដែលចង់ដុតផ្ទះយើងដើម្បីចំអិនពងមាន់របស់អ្នកបានឡើយ"៕
